Сюмси ёросын "Кыӵе тон, удмурт семья" проектсы йылпумъяськиз

 Шулдыр удмурт фестиваль ортчиз Дмитрошур клубын!Ёрос ёзэтмылэн кивалтӥсез Нина Южакова ивортэ:Ужрадмы зэмзэ но шуныт семья праздниклы пӧрмиз. Шулдыр кырӟанъёсын пумитаз куноосты "Кенакъёс" ансамбль. Проектэ пыриськисьёслэн киужъёсынызы адӟытон радъямын вал, мар но ӧй вал отын, удмурт чеберъяськонъёс но, керттэм но вурем арбериос, туж но ческыт шунянь!Фестивале дас вить семьяос пыриськизы. Со семьяос сярысь дас вить история учкимы. Соос возьматӥзы асьсэлэсь улонзэс, семьяязы возиськись сям-йылолъёсты, быгатонъёссэс."Кыӵе тон, удмурт семья" ӵектос радъяськиз "Росмолодёжь.Гранты" юрттэмъя.