Россиысь Правительстволэн Тӧроез Михаил Мишустин Правительстволэн 2025-тӥ арын ужамезлы йылпумъянъёс лэсьтӥз

Кун Думалэн Тӧроез Вячеслав Володин пусйиз: Правительстволэн ужамез сярысь туэ кылзӥськомы вазьгес — Правительстволэн отчётэз азьын но со дыръя калыклэсь вуэм тросгес куронъёссэс туэ ар куспын быдэстыны мед вуттомы. Вуизы 12 сюрслэсь ятыр вазиськонъёс. Соос уноез герӟаськемын социальной удысэн.Михаил Мишустин пӧртэм удысъёсъя йылпумъянъёс лэсьтӥз. Кылсярысь: Цифровизация: кун услугаосъя огъя порталын 35 пумо юрттэт ватсаськиз — табере портал пыр дорысь потатэк 70 юанъёсъя юрттэт басьтыны луэ. Цифровизация паськыт пыӵа вань нацпроектъёсты быдэстон ласянь — озьы соос улонэ ӝоггес пыӵало. Но цифровой амалъёс азинскемен шаплыгес луо мошенникъёс но. Соосын нюръяськон вылысь кылем арысен, кылсярысь, адями кредитъёслы самозапрет пуктыны быгатэ.Социальной выплатаос, нылпиосын семьяослы юрттон: та ласянь федерал бюджетысь калыклы 70 пумо юрттэт сётӥське. Бадӟым саклык висъяське демографилы. Одӥгез капчиятон: кылем арын кутэмын 2 но солэсь трос пиналзэс будэтӥсь анайёслы но атайёслы вытъёсъя капчиятон сярысь закон. Мумы-бубы официальной ужын ужало ке, адямилы быдэ доходзы прожиточной минимумлэн 1,5 быдӟалаезлэсь ичи ке, НДФЛ-эз лыдъялозы 6 процентэн (али 13). Туэ ар понна перерасчёт лэсьтыны кутскозы. Куриськонъёсты кутозы 1-тӥ июньысен. Та капчиятонэз ас вылазы шӧдозы 4 миллионлэсь ятыр семьяос.Сюресъёс, улон инты: кылем ар куспын лэсьтэмын-выльдэмын 28 иськем сюресъёс — азьвыллэсь 15 процентлы ятыргес. 300 иськемлы кузьгес луиз Екатеринбургозь М-12 «Восток» трасса. Азинтӥськоз трос ӝоглыкъем чугун магистральёсты пуктон. Миым сое лэсьтыны кутскизы ни Москва но Санк-Петербург куспын. Пуктэмын выль аэропортъёс. Кылсярысь, Ижын, Минеральные Водыын, Тюменьын. 2025-тӥ ар куспын ӝутэмын 108 миллион улон юртъёс. 960 сюрс семьяослы капчиятэм ипотка висъямын.

Елена Слащёва.
Туспуктэм: Кун Думалэн сайтысьтыз.