Эшлыко ӵошатскон

Шаерамы улӥсь калыкъёслэн 13 командаоссы пыриськизы футзалъя (пичи футбол) элькун ӵошатсконэ. Вожвылъяськон сӥземын вал Россиысь калыкъёслэн эшъяськон арзылы, Удмурт Элькунлэн нырысетӥ президентэзлы А. Волковлы, кунмес утисьёслэн нуналзылы.Кунамы «Спорт России» программа пыӵатӥське Президентлэн В. Путинлэн решениезъя. Таин валче спортэз азинтонлы сӥзем пӧртэм ужъёс быдэсъясько.
Туэ шаерамы улӥсь калыкъёслэн огазеяськонъёссылэн ёзчиоссы шахматэн шудӥзы ини. Ар ӵоже соосты тунсыко программа возьма на: дартс, фиджитал-футбол, компьютер спорт, ӝӧквыл теннис, бильярд, нарды, боулинг, волейбол, бигер шудонъёс, гозы кыскан.
Футзалъя элькун ӵошаськонэ 200 пала адями пыриськиз. Турнирез усьтӥз Тӧролэн но Правительстволэн администрациенызы кивалтӥсь Александр Журавлев.
— Калыкъёс куспын ӵошатсконъёсы адямиос семьяосын лыкто. Вуо егитъёс но. Спорт ваньмес огазея!
Футзалъя ӵошатсконэ 13 команда пыриськиз. Соос понна дасямын на вал тунсыко программа, эктонъёс.
Нош вормисе потӥз шаерамы улӥсь азербайджанъёслэн «Хазар» командазы.Вань вормисьёс пусъемын кубокъёсын, дипломъёсын, медальёсын.
— Туэ турнирмы 17-тӥзэ ортчиз ини, — шуиз йӧскалык политикая министр Эдуард Петров. — Со пӧртэм выжыысь адямиосты огазея. Ми одӥг команда кадь луиськомы.
Трос аръёс ӵоже ини та ӵошатсконэз ортчыто Йӧскалык политикая министерство, Эшъяськон юрт. Соослы юрттэ, спортэз гажасьёсты ас котыраз кыске шаерысьтымы армянъёслэн «Арарат» огазеяськонзы.

Валентина Емельянова.
Туспуктэмъёс: Тӧролэн но Правительстволэн пресс-службаез.