Грак ёросысь Выльгуртысь Федора Кузнецовалы ӝоген 95 арес тырмоз ни

Со али но черсӥське, СВО-ысь ожгарчиослы пыдвылъёс керттон понна.Грак ёросысь волонтёръёслэн «Тыл Грахово» движенизы 2 ар талэсь азьло кылдӥз. 12 мастерскойёсын маскировочной сеть пуно, 1 сюрс 318 сетьёссэс спецоперацие келязы ни.Гуртъёсын улӥсьёс, гурт хозяйствоос но быгатэмзыя юрттӥсько. Кылсярысь, «Верхнеигринский» инты ёзысь кырӟаны-вераны яратӥсьёс гуртъёстӥ концертъёс пуктылыса ветло. Билет вузам уксёзэс «Тыл Грахово» движенилэн боевой копилкаяз келяло. Вужгуртысь клубын ужась Татьяна Овсянникова гуртысь мыло-кыдо нылпиосты люказ но, Выль ар каникулъёс дыръя ваньзы ӵош пӧртмаськыса ветлӥзы. Быдэс мешок тыр ческыт конфет но 27 сюрс манет пала уксё люказы. Со уксёен 36 сеть керттыны тырмымон спанбонд басьтӥзы.
Пуклё гуртын улӥсь Василий Батырев но ас быгатэмезъя юрттӥське. Мылкыд карисьёс, пе, дораз ыжгон ваё, нош воргорон соосты туге но Грак но Можга ёросъёсысь черсыны быгатӥсьёслы люкылэ. Таӵе киужлы шумпотӥзы ни Грак черкогуртысь Любовь Бельская, Выльгуртысь Федора Кузнецова но мукетъёсыз.
Черсон уг вуны
Федора Романовна Кузнецовалы май толэзе 95 арес тырмоз ни, нош со тэк пуконэз уг тоды.
— Выльгуртын вордӥськи но татын ик улӥсько. Картэ 7 ареслы пиналгес вал, валче 45 ар улӥмы, табере луло ӧвӧл ни. Ӵошен 3 пинал вордӥмы, табере внукъёсмы будо. Ачим война вылтӥ будэмын бере, мар со секыт улон, тодӥсько, соин ик киосы мыныку, синмы адӟыку, пиосмылы юрттӥськеме потэ, вормонэз ӝоггес матэктытоно, — шуэ кышномурт.
Федора Романовналэн одӥг класс но дышетскемез ӧвӧл. Начар семьяын курадӟыса, кураськыса будэмын. Школае мынэм вылэм буш сумкаен, дышетӥсь ӝоже уськытэм: малы уд гожъяськиськы шуыса, линейкаен йыраз шуккем. Нылаш школае мынымтэ ни. Дышетскыны но гожъяськыны дышем, 4 ареслы пичи выныз школае мынэм бере. Солэсь адӟем карыса, бодыен суй вылэ гожъяськылэм, али солэн почеркез туж чебер. Ужаны анаезлэсь дышем. Сьӧраз колхоз бусые араны ветлэм, собере аслэсьтыз нормазэ но быдэсъям. Котьку передовой ужась вылэм. Улытозяз со колхозын тыршемын, скал кыскемын, ветыл сюдэмын.
Кышномурт ялан пичи дырзэ син азяз пуктэ. Серемез но потэ, соку первобытной адямиос кадесь, пе, вал. Гурт вадестӥзы лобӟись дирижаблез но самолётэз нырысьсэ адӟемзы бере, усёз кожаса, кесяськыса пегӟиллям. Война аръёсты вунэтэмез уг луы. Со кышкыт вакытэз нокин но медаз адӟи ни вылэм, но улон, пе, нош ик адямиосты синкылияськытэ.
Киужлы усто анаезлэсь адӟем карыса, Федора 12 аресказ черсон машина сьӧры пуксем. Нырысь пуксемаз ик вольыт пӧрмытэм, гуртоосыз ик паймиллям.
— Егит дыръямы етӥнэз но черсылӥмы. Ой, выронэз вал ук отын! Бусыысь ишкимы, толлы музъем вылэ вӧлдыса кельтылӥмы. Тулыс гинэ сое октылӥмы но мунчоын куасьтылӥмы. Собере сэстылӥмы, шуккылӥмы но мертчанзэ черсылӥмы. Ӵем дыръя черсэме базар сӥньыс кадь векчи но тэгыз пӧрмылӥз. Бӧрысь со сӥньысъёсын дэрем куылӥмы. Туала черсон сярысь верано ке, ыжгон тугемын, киослы небыт, черсэмъя черсэм потэ, — шуэ Федора Кузнецова.

 Валентина Емельянова.

Туспуктӥз Наталья Долгова.