Удмурт кылэз но литератураез гажасьёслэн но сое азинтӥсьёслэн, кылбураны яратӥсьёслэн огинзылы 5 ар тырмиз

13-тӥ тулыспалэ Ижысь Эшъяськон юртын шуныт пумиськон ортчиз. Пӧртэм ёросъёсысь вуэмъёс вотэс бам пыр ог-огзэс шедьтӥзы, нош соослы огазеяськыны юрттӥз Пичи Пурга ёросысь Брангуртысь журналист Виктор Занчаров . «ВКонтакте» вотэс бамын аслэсьтыз «Дунневыл меӵкытонъёс » группазэ кылдытӥз, удмурт кылын шонер гожъяськыны мылкыд карисьёслы нимысьтыз чат усьтӥз. Котыраз люказ лэчыт веранъёсын тунсыкъяськисьёсты, кылбураны дышетскисьёсты. Огиназы туннэ 1 сюрс 212 мурт люкаськемын.
Пумиськонэз радъяны юрттӥз «Удмурт Кенеш» огазеяськонлэн Ижысь Первомай ёросэз. Ужрадэ пыриськисьёсты ӟечкылазы Кун Кенешлэн Тӧроезлэн воштӥсез, Наукая, дышетонъя но граждан обществоез азинтонъя ялан ужась комиссилэн кивалтӥсез Татьяна Ишматова , «Удмурт дунне» газетлэн редакторез, «Удмурт Кенеш» огазеяськонлэн кивалтӥсезлэн воштӥсез но «Удмурт нылкышно кенеш» огазеяськонлэн кивалтӥсез Елена Миннигараева , филология наукаосъя кандидат, Удмуртиысь калык писатель, культура но наука удысъёсысь дано ужась, журналист но литературовед Александр Шкляев, Удмуртиысь калык писатель Вячеслав Ар-Серги, кылбурчи, журналист Татьяна Чернова но мукетъёсыз.
Огинэ пыриськисьёс асьсэ гожтэм чуръёссэс лыдӟизы, кырӟанъёссэс быдэстӥзы, серемес сценкаос пуктӥзы. Вераны кулэ, тросэз кылбуръёссы кырӟанлы пӧрмемын ни, пӧлысьтызы тужгес яркытъёссэ быдэстӥз Россиысь дано артист но Удмуртиысь калык артист Геннадий Кузнецов.