14-тӥ тулыспалэ Башкортостанысь Татышлы ёросысь Выльгуртын "В единстве - сила!" этно-социальной марафон ортчиз

Ужрад радъяськиз Башкортостанысь удмуртъёслэн лулчеберетъя центразы, Россиысь калыкъёслэн огъя луэмзылэн арез, Башкортостанын семьялэн арез но "Трезвое село" элькун вожвылъяськон улсын.Марафонлэн нырысетӥ люкетаз тодмо удмурт суредасьлы Менсадык Гариповлы сӥзем ужрад ортчиз. Удмуртиысь калык суредасьлы, Россиысь дано суредасьлы туэ тырмысал 80 арес. Удмуртъёслэн лулчеберетъя центразы Месадык Гариповлэсь сӥё-дано бюстсэ усьтӥзы. Люкаськемъёс "Этнокультурное наследие Менсадыка Гарипова в системе воспитания здорового поколения!" конференцие пыриськизы. Со дыре ик центрлэн фойеаз "Улыбка Менсадыка" вожвылъяськонын вормем пиналъёслэн суредъёсынызы адӟытон ужаз.Ужрадэ вуизы Удмурт Элькунлэн Кун Кенешысьтыз лулчеберетъя, туризмъя но йӧскалык политикая ялан ужась ӧрилэн кивалтӥсез, "Удмурт Кенеш" огазеяськонлэн Тӧроез Андрей Ураськин, Башкортостанысь Кун Собранилэн – Курултайлэн депутатэз Кашшаф Ямалетдинов, Татышлы ёрослэн йырыз Фанур Шайхисламов, солэн мерлыко юанъёсъя кивоштӥсез Альфия Шайнурова, Менсадык Гариповлэн нылыз, ӵыжы-выжыосыз, эшъёсыз, тодмоосыз, гуртоосыз, Удмуртиысь делегация пыриськизы. Удмуртиысь ӧтем куноос пӧлын: "Удмурт Кенеш" огазеяськонлэн исполкомезлэн ёзчиез Наталья Михайлова, Камсьӧр удмуртъёслэн центрзылэн кивалтӥсез Флюра Чибышева, Удмурт Элькунысь Калык писатель Ульфат Бадретдинов, "Кизили" журналлэн валтӥсь редакторез Людмила Чернова, суредась, Удмурт Республикалэсь кунпуссэ но куншетсэ кылдытӥсь Юрий Лобанов, суредась Расиф Батыршин.Ужрад улсын нимысьтыз саклык висъямын вал Выльгурт школаын покчи классъёсын дышетскись пиналъёслы. Соос "Кизили" журналэн матысьгес эшъяськизы. Менсадык Гариповлэн журналэ потылэм ужъёсыныз тодматскизы. Пиналъёс паймизы: макем быгатыса ужам иллюстратор нылпи журнал бордын, котькуд суред улэп кадь шуизы.Марафон яркыт йылпумъяськиз "Мост поколений" ёроскуспо фестивален. Сцена вылын зэмос праздник ортчиз: ӟуч, башкир, удмурт но пор семьяос асьсэ быгатонлыкъёсынызы, сям-йылолъёсынызы тодматӥзы, чеберлыко киужъёсъя мастер-классъёс ортчытӥзы.