"Удмурт Кенеш" огазеяськонлэн Тӧроез Андрей Ураськин Ижкарлэн тӧроеныз Дмитрий Чистяковен пумиськылӥз

Соос кылем арын кутэм ужпумъёслы йылпумъянъёс лэсьтӥзы но азьланезлы выльёссэ чаклазы.Вераськизы Удмуртилэн шоркараз удмурт аспӧртэмлыкез утён пумысен. Йӧскалык музей котырез (Арсенал кварталэз) азинтон, удмурт гожъясьлы, одӥгез удмурт кунлыкез кылдытӥсьлы Максим Прокопьевлы но нырысетӥ удмурт нылкышно кылбурчилы Ашальчи Окилы синпелетъёс пуктон луонлыкъёсты эскеризы.Тодады вайытом, 2025-тӥ арын Ижкарез умоятон правилоосы тупатонъёс пыртэмын вал, соя вань адрес пулъёс удмурт но ӟуч кылын гожтэмын луыны кулэ. Со бордын тыршизы Йӧскалык политикая бордын ужась Удмурт кылын нимкылъёсъя но шонер гожъяськонъя элькун ӧрилэн ёзчиосыз.