Кун Кенешлэн юртаз Йӧскалык печатьлэн нуналэзлы сӥзем сӥё-дано ужрад ортчиз

Праздник котьку сямен ивор вӧлмытон удысын тыршисьёсты огазеяз, устоосыз - кун данъетъёс но сӥлы карон пусъёс басьтӥзы.Ужрадын пусйизы Эрик Батуев нимо йӧскалык премилэсь лауреатсэ но. 2025-тӥ ар понна дано нимез басьтӥз «Удмурт дунне» газетлэн корреспондентэз, «Удмурт Кенеш» огазеяськонлэн Ижкарысь Первомай ёрос ёзэтэзлэн ёзчиез Емельянова Валентина Анатольевна.Емельянова Валентина Анатольевна – «Удмурт дунне» редакциын 30 арлэсь кема тырше ни. Творчествояз бадӟым инты басьтэ йӧскалык политикалы сӥзем гожъямъёс. Журналистлэн устолыкез вылӥ дунъямын быдэс россиын. Со «Лучшее интервью в печатных СМИ», «Лучший материал в печатных СМИ» номинациосын вормись луэ. Экстремальной условиосын ужась журналистъёс понна дышетскон ортчиз. Вуылӥз Луганск Калык Республикаысь Лутугинский ёросэ. Отын улӥсьёсты Удмурт Элькунлэн йӧскалык лулчеберетэныз тодматӥз. Мыло-кыдо пыриське «Удмурт Кенеш» огазеяськонлэн ужаз.Вань сюлмысь ӟечкыласьком выль лауреатмес!Пусъём, Эрик Батуев нимо йӧскалык премия сётӥське 2011-тӥ арысен "Удмурт Кенеш" огазеяськонлэн кичӧлтэмезъя. Сое басьтыны быгато удмурт но ӟуч кылъёсын гожъяськись журналистъёс. Соос асьсэ ужъёсазы удмурт калыклэсь историзэ, лулчеберетсэ возьмато ке, сюлмаськытӥсь ужпумъёссэ ӝуто ке, удмуртъёслэн улонзы сярысь пӧртэм ужрадъёсты паськытгес возьмато ке.