Субсидиос но грантъёс ужаны юртто

Берло 7 ар куспын шаерысьтымы потребкооперативъёслы 150 субсидиос но грантъёс висъямын.
Сиён-юон поттӥсьёслы субсидиосын но грантъёсын юрттонъя программа быдэсъяське 2019-тӥ арысен. Потребкооперативъёс техника, мукет тӥрлык басьто но, быдтэм коньдонзылэсь оглюкетсэ субсидиос но грантъёс чотын берыктыны быгато.— Берло 7 ар куспын 27 потребкооперативъёслы 134 субсидия висъямын — арлы быдэ 71 миллион манетлэсь ятыр. Кылем арын, кылсярысь, 72 миллион манет мында субсидиос келямын 19 огазеяськонъёслы. Грантъёс сярысь верано ке, 7 ар ӵоже 262 миллион манет сётэмын 23 огазеяськонлы. Миым 40,6 миллион манет басьтӥз 4 огазеяськон, — шуиз гурт удысъя но сиён-юонъя министр Василий Муклин.

Субсидия но грант басьтэм огазеяськонъёс пӧлын — Сьӧлта ёросысь «Батыр» кооператив. Со бурд улаз огазея 100-лэсь ятыр фермеръёсты но нимаз хозяйствоосты. Кооператив нуналмысь сюлмаське ӟеч продукция поттон, производствозэс йылтон сярысь. Кылем арын 10 миллион манет тыр грантэн кужмо комбайн басьтӥз, пудо сюдон цехъёссэ выльдӥз. Миым пудолы ӟеч сиён дасяз — та понна азвесь медален пусъемын вал Россиын ортчылӥсь «Золотая осень» адӟытонын «Гуртысь ужбергатон» номинациын.
Туспуктэм: Гурт удысъя но сиён-юонъя министерстволэн "ВКонтакте" бамысьтыз.
Василий Муклин пусъемъя, туэысен кунамы пыӵаны кутскиз «Развитие малого агробизнеса» федерал программа. Со улсын гурт копперативъёслы туэ 99,7 миллион манет тыр юрттэт висъяськоз.