Удмурт кылэз дышетӥсь но пӧртэм удмурт ужрадъёсы мыло-кыдо пыриськись пиналъёс понна йӧскалык Выль ар ортчиз Ижкарын

Ужрад радъяське котькуд ар, "Удмурт Кенеш" огазеяськон кичӧлтэмъя но Ижкарысь удмурт кылъя но литературая дышетӥсьёслэн методикая кар огазеяськонзы юрттэмъя.Туэ праздник Ижкарысь 60-тӥ номеро школаын ортчиз. Татчы люкаськизы Столичной лицейысь, 56-тӥ номеро гимназиысь, 11-тӥ, 17-тӥ, 34-тӥ, 46-тӥ, 59-тӥ но 60-тӥ номеро школаосысь 6-тӥ-9-тӥ классъёсын дышетскись 70 нылъёс но пиос. Котькудӥз соос пӧлысь удмурт кылъя кар, элькун, улоскуспо но огъяросси вожвылъяськонъёсы, олимпиадаосы, тодослыко конференциосы но мукет ужрадъёсы мыло-кыдо пырисько.Дышетскись пиналъёслы ӟеч мылкыд сӥзиз "Удмурт Кенеш" огазеяськонлэн Тӧроез Андрей Ураськин. Озьы ик со тау кариз дышетӥсьёссылы, пиналъёслы удмурт кылэз но лулчеберетэз гажан но яратон мылкыд пыӵатэмзы понна.Ужрад азинтӥськиз шулдыръяськонэн: чузъяськизы удмурт кырӟанъёс, нылпиос удмурт эктонъёс эктӥзы, йӧскалык шудонъёсын шудӥзы. Котькудӥз Тол Бабайлэсь кузьым но утӥз.Нош со вакытэ удмурт кылъя дышетӥсьёс котырес ӝӧк сьӧрын кенешон ортчытӥзы.Тау кариськом куно каремзы понна 60 номеро школалы, нимысьтыз Елена Николаевналы, но ужрадмес нуэмез понна Столичной лицейысь Медиацентрен кивалтӥсьлы Вероника Ваулиналы! Нош пиналъёслы сӥзиськом выль вормонъёс но азинлык!