Удмурт калыклэн дано пиез Кузебай Герд вордскем дырысен 128 ар тырмиз

"Удмурт Кенеш" огазеяськон кичӧлтэмъя но Кузебай Герд нимо йӧскалык музей юрттэмъя, арлы быдэ югдытӥсьмылэн синпелетэз доры лыктӥськом. Туннэ но татчы трос калык люкаськиз - элькун кивалтӥсьёс, кенешчиос, тодосчиос, журналистъёс, дышетӥсьёс. Шумпотымон, пӧламы трос гинэ пиналъёс вал - 11-тӥ, 17-тӥ, 93-тӥ номеро школаосын, Кузебай Герд нимо гимназиын но Столичной лицейын дышетскисьёс. Бадӟым делегациен вуизы вавожъёс.Югдытӥсез данъяса, люкаськемъёслы вазиськизы Кун Кенешысь лулчеберетъя, туризмъя но йӧскалык политикая ялан ужась ӧрилэн кивалтӥсез, "Удмурт Кенеш" огазеяськонлэн Тӧроез Андрей Ураськин, Кун Кенешысь ужъя, мер политикая но ветеранъёсын ужанъя ялан ужась ӧрилэн тӧроез, элькунысь нылкышноослэн огазеяськонзылэн кивалтӥсез Елена Дербилова, Кузебай Герд нимо йӧскалык музейлэн кивалтӥсез Александр Волков, Кун Кенешысь депутат, "КПРФ" партилэн кивалтӥсез Владимир Бодров, "Удмурт Кенеш" огазеяськонлэн Вавож ёросысь ёзэтэзлэн кивалтӥсез Ирина Ложкина. Соос пусйизы, макем бадӟым пытьы кельтӥз Кузебай Герд удмурт литератураын, Удмурт шаерын, кӧня кужымзэ сётӥз музейлэн ужаз.Люкаськемъёс Кузебай Гердлы тау карыса йыбырттӥзы, синпелетэз доры сяськаос понӥзы, пиналъёс кылбуръёссэ лыдӟизы. Собере ужрад азьланьтӥськиз йӧскалык музейын, татын мылкыд карисьёслы экскурсия радъяськиз.