«Пичи Чеберайёс но Батыръёс» («Маленькие Красавицы и Богатыри» фестивальлэн финалэз ортчиз!

Ужрад Калыкъёслэн Эшъяськон юртазы радъяськиз. Ижкаре ёросъёсысь 100 пала синмаськымон но быгатӥсь пиналъёс люкаськизы. Ваньзы соос – ёросазы, городъёсазы вормисьёс. Устоосыз нимаз быръемын – садике ветлӥсь нылпиос пӧлысь но, школае ветлӥсьёс пӧлысь но.Выль ар мылкыд нылпиослы пыӵатыны юрттӥзы Тол Бабай, Лымыныл, Лымыпогъёс, Кукри Баба. Нылпиосты ӟечкылазы «Удмурт Кенеш» огазеяськонлэн Тӧроез Андрей Ураськин, «Удмурт нылкышно кенеш» огазеяськонлэн кивалтӥсез Елена Миннигараева. Вань лыктэм пиналъёс син-пель кузьымъёсын, таукаронъёсын пусъемын вал.Нялтас вераса, «Пичи Чеберайёс но Батыръёс» («Маленькие Красавицы и Богатыри») конкурс ас бордаз кыскиз Удмурт Элькунысь 500 пала нылпиосты. Ужрадэ котьку сямен Татарстанысь пиналъёс но пыриськизы.Ӵектос радъяське «Удмурт нылкышно кенеш» огазеяськонлэн кичӧлтэмезъя, Вань удмуртъёслэн "Удмурт Кенеш» огазеяськонзы, Йӧскалык политикая министерство но Калыкъёслэн эшъяськон юртсы юрттэмзыя.