Луганск республикаысь Лутугино ёросэ вуылӥзы удмурт Тол Бабай но Лымыныл

Ӵапак та ёрослы юрттон понна 2 арлэсь кема ини кыл кутэ Удмурт шаер.
Тол Бабайлы но Лымыныллы шокчыны маза ӧй вал. Пиналъёсты вусь Выль арен ӟечкыланы вуылӥзы ёросысь нылпи садъёсы, пыриськизы Лутугино городысь Выль ар кызэз усьтон ужрадэ, калыкен пумискылӥзы Луганск городын ортчем ужрадъёсын.
Тол Бабай но Лымыныл Лутугино палъёсы буш киын ӧз вуэ. Отысь нылпиослы кузьмазы 2 сюрс 200 ческыт саламъёс. «Огъя Россия» партилэн Удмурт ёзэзлэсь эшшо 300 саламъёс люкылэмын вал.
— Удмурт Тол бабай но Лымыныл ми доры вуизы ни куинетӥзэ, — шуиз Удмуртилэн Лутугино ёросысь оскем муртэз, элькун Тӧролэн советникез Михаил Трофимов. — Пиналъёс соосты табере чидатэк витё ни. Нылпиос гинэ ӧвӧл, социальной юртъёсын ужасьёс но туж шумпото соослэн вуэмзылы.Ческыт саламъёс сяна, Лутугино ёросэ гуманитарной юрттэт келямын. Лутугино ёросысь 1 номеро шор ёзо школалы физикая урокъёсты нуыны тӥрлык ыстэмын. Нялтас ваерса, та школалэсь ваньбурзэ выльдыны курыса Тӧролы Александр Бречаловлы вазиськиз вал школалэн кивалтӥсез Анжелика Лютикова. Со сяна, «Связаны вместе» фондлэсь Лутугино ёросысь Белореченский каргуртысь нылпи садлы ыстэмын нылпиослы 50 кроватьёс. Ӵапак та садэз 2023-тӥ арын пуштытӥзы вал Киевлэн ожгарчиосыз. Удмуртиысь лэсьтӥськсьёс сое быдэсак выльдӥзы. Али но юртэз тупатъяно лкэ ке — юртто шаерысьтымы воргоронъёс.Тол Бабаен но Лымынылэн ӵош Лутугино ёросэ вуылӥз «Огъя Россия» партилэн Удмурт ёзэзлэн исполкомезлэн кивалтӥсез Александр Шамшурин. Партилэн Лутугиноысь ёзэзлы кузьмаз техника, социальной юртъёсысь нылпиослы 120 пар пыдкутчанъёс сётӥз — соосты люказы Удмуртиысь азербайджанъёслэн «Достлуг» центрысьтызы азьветлӥсьёс. «Ёлка желаний» акция улсын Александр Шамшурин быдэстӥз 12 аресъем Софьялэсь куронзэ — солы наушникъёс кузьмаз.
Туспуктэмъёс: Тӧролэн но Правительстволэн пресс-службаез.