Пермь улосвылысь Чайковский карын удмурт лулчеберетлы сӥзем нуналъёс ортчизы

Пермь улосвылэ Чайковский но Чернушка каръёсысь, Куеда ёросысь удмуртъёс, озьы ик удмурт лулчеберетэн тунсыкъяськисьёс люкаськизы. Удмуртиысь делегация но быдэс автобусэн вуиз. Вуэм куноосты кырӟаса "Зарни сӥзьыл" ансамбль пумитаз.Ужрад кутскиз пленарной кенешонэн. Люкаськемъёслы ӟеч мылкыд сӥзьыса вераськизы ӧтем куноос: Чайковский карлэн Администрациезлэн тӧроез Алексей Агафонов, Пермь улосысь йӧскалык но вӧсьбур кусыпъёсъя Департаментлэн кивалтӥсезлэсь саламзэ вераз Ирина Дьяконова, Удмурт Элькунысь йӧскалык политикая министр Эдуард Петров, Вань удмуртъёслэн "Удмурт Кенеш" огазеяськонзылэн Тӧроез Андрей Ураськин.Ужрадэ пыриськисьёс удмурт кылэз но лулчеберетэз утён, соосты азинтонын туала амалъёсты кутон сярысь кенешизы, улонэ пыӵатэм ӵектосъёсынызы тодматӥзы, выль кылдэм малпанъёсты учкизы. Чайковский карысь "Зарни сӥзьыл" мерлыко огазеяськонлэн кивалтӥсез Людмила Филиппова но Чернушка карысь "Италмас" мерлыко огазеяськонлэн кивалтӥсез Марина Шарафисламова мадизы, кызьы соос ас интыосазы удмуртъёсын ужало, кыӵе луонлыкъёс кылдыто удмурт кылэз но удмурт лулчеберетэз асьсэ дорын утён но азинтон понна. "Удмурт Кенеш"-лэн Тӧроез Андрей Ураськин огазеяськонлэн ӵектосъёсаз мыло-кыдогес пыриськыны куриз, азьпалаз но ӵошен ужрадъёсты ортчытыны мылкыдзэ вераз. Удмурт егитъёслэн "Шунды" огазеяськонзылэн тӧроез Александр Ильин асьсэ проектъёссы сярысь мадиз, пиналъёсты "Шундыкар" лагере ӧтиз. Удмуртиысь калык творчествоя юртысь ӧнерчи Степан Плотников удмурт кыллэсь но лулчеберетлэсь узырлыксэ фольклор пыр возьматӥз.Удмурт лулчеберетъя нуналъёс азьланьтӥськизы секциосын но мастер-классъёсын. Одӥгез тематической площадка улсын Йӧскалык прессалэн юртысьтызы ужасьёсын пумиськон ортчиз. "Инвожо" журналлэн валтӥсь редакторез Елена Петрова (Дарали Лели) но Удмуртиысь гожъяськисьёслэн огазеяськонзылэн тӧроез Пётр Захаров литература сярысь вераськизы. "Шунды" огазеяськонысь егитъёс школаын дышетскись пиналъёсты удмурт лулчеберетэн тодматӥзы, соосын калык шудонъёсын шудӥзы. Пичи Пурга ёросысь Вуж Монья гуртысь киужъёсъя юртысь ӧнерчиос калык киужъёслы дышетӥзы, котькудӥз быгатӥз ас киыныз поскес куыны.Яркыт но пуштросо ужрад йылпумъяськиз концертэн. Люкаськемъёсты шулдыртӥзы фольклоръя "Пинал даур" калык ансамбльысь артистъёс но удмурт эстрадаысь егит кырӟась Chupai Eli (Эльвира Панченко).Ужрадлэн радъясьёсыз: Удмурт Элькунысь йӧскалык политикая министерство, Калыкъёслэн Эшъяськон юртсы, Вань удмуртъёслэн "Удмурт Кенеш" огазеяськонзы.