Эшъяськон юртын «Удмурт Кенеш» огазеяськонлэн Пичи кенешез люкаськылӥз

 Туэ со сӥземын вал 30 ар талэсь азьло кылдытэм Удмурт кылъя термино-орфографической комиссилэн (РТОК) котырес лыдпусэзлы. Асьсэ уженызы, сюлмаськонъёсынызы тодматӥзы комиссилэн куд-ог ёзчиосыз.

 Трокай Борисов нимо йӧскалык премия аслэсьтыз кузёоссэ шедьтӥз. Валентин Кузьмич Тубыловлэн нимыз быдэс шаермылы тодмо луэ. Со — Удмурт Элькунлэн дано кунмуртэз, «Удмурт Кенеш» огазеяськонлэн азьвыл тӧроез. Огшоры ужась бордысен кутскыса, со вылӥ кивалтӥсь дорозь будӥз. Котькыӵе ужын ассэ визьмоен, ӝог малпаськыны быгатэменыз паймытӥз. Со кивалтэм улсын кутэмын Удмурт Элькунлэн Конституциез но мукет трос правовой документъёс. Нош кемалась ӧвӧл — 13-тӥ шуркынмонэ — со 90 арессэ тырмытӥз.

 Григорий Спиридонович дышетӥсьёсты дасянъя Можга карысь Т. Борисов нимо колледжлэн директорез луэ, «Удмурт Кенеш» огазеяськонлэн Можга ёросысь ёзэныз кивалтэ. Удмурт кадръёсты будэтонъя бадӟым уж нуэ, сюлмаське удмурт кылэз утён но азинтон понна. Солэн кивалтэмез улсын шаерамы покчи классъёсты но удмурт кылъя дышетӥсьёсты дасяло.

 Пичи кенешын озьы ик сӥлы каризы «Удмурт Кенешлэн» Данъян книгаяз пыртэм муртъёсты: Башкириысь удмуртъёслэн лулчеберетъя йӧскалык центрзылэсь ёзчизэ Антонида Шайбаковаез, «Удмурт Кенеш» огазеяськонлэсь Глазов ёросысь ёзчизэ Надежда Лебедеваез, Дэри ёросысь Якшур муниципал кылдытэтлэсь кивалтӥсьсэ Николай Мерзляковез.

 Елена Слащёва.