Ижысь аэропортлы сётэмын Михаил Калашниковлэн нимыз

Ижысь аэропортлы сётэмын Михаил Калашниковлэн нимыз — та сярысь указзэ 14-тӥ ноябре юнматӥз Президент Владимир Путин

 Аэропортысь выль терминалэз пуктыны кутскизы 2023-тӥ арын. Со интыяськемын 20 сюрс 800 квадрат метр вылын. Кыӵе солэн вылыз-пушкыз луыны кулэ — ӵектэм дизайн-проектъёс пӧлысь бырйиз калык. Туэ 20-тӥ сентябре ӵыж-выль терминал котыре пуксиз нырысетӥез самолёт, со вуиз Сочиысь.

 Выль терминалын ваньмыз пассажиръёс сярысь сюлмаськыса радъямын: ураме потатэк, 3 телетрап кузя пырак самолётозь вуыны луэ. Экранъёс вылын ивортонъёс ӟуч, удмурт, англи но китай кылъёсын возьматӥсько. Терминал пассажиръёсты сентябрьысен пумита-келя ни ке но, сое сӥё-дано усьтон ужрад ортчоз 20-тӥ ноябре. Вуоно арысен отысь самолётъёс лобаны кутскозы кунгож сьӧры но. Чакламын ни Турцие, Египетэ, Огазеям Араб Эмиратъёсы, СНГ-е пырись кунъёсы терминалъёс луыны кулэ шуыса.
Самолётэн лобасьёслэн лыдзы йылэ: 2019-тӥ арын Ижысь аэропортысь лобизы ке 350 сюрс адямиос, туэ 6 толэзь куспын — 420 сюрс пала. Час куспын выль терминал пыр ортчыны быгато 400 пассажиръёс — вужезлэсь 2 поллы тросгес.

 Терминаллэсь дизайн-проектсэ сяна, нимзэ но бырйиз калык. Удмуртиысь Общественной палата сюлмаськемъя юалляськон радъяськиз. Ӵектэмын вал ог 100 пала нимъёс, пӧлазы — шаерысьтымы нимо-дано адямиос. Кылсярысь, удмурт кылбурчиос Кузебай Герд но Ашальчи Оки, композитор Пётр Чайковский, конструктор Михаил Калашников. Берпуметӥезлы дурбасьтэмзэ вераз тужгес трос калык — 70 сюрслэсь ятыр куара люкаськиз. Президент калыклэн мылкыдызлы дурбасьтӥз.

Елена Слащёва.

Туспуктэм: "Ижавиа" огазеяськонлэн сайтысьтыз.