Москваысь «Россия» йӧскалык центрын сӥлы каризы «Семья года» конкурсын вормисе потэмъёсты

Москваысь «Россия» йӧскалык центрын сӥлы каризы «Семья года» конкурсын вормисе потэмъёсты

 Та конкурс туэ 10-тӥзэ ортчиз. Отчы пыриськизы Россиысь пӧртэм улосъёсысь 11 сюрс семьяос, финалэ потӥзы 89-эз. Семьяосты дунъязы пӧртэм номинациосъя, кылсярысь, «Трос нылпиё семья», «Сям-йылолъёсты утись семья», «Атыкай музъеммес утисьлэн семьяез», «Гуртысь семья», «Егит семья», «Зарни семья».

 — Президент Владимир Путин котьку шуэ: семьяослы юрттон, семьялэсь данзэ ӝутон — кунмы понна валтӥсь интыын. Соослы юрттэт сётон ласянь странаямы пӧртэм ужрадъёс кутӥсько, нылпиосын семьяослэн куронъёссы котьку лыдэ басьтӥсько, — сӥлы карон ужрадэ люкаськемъёслы шуиз Правительстволэн Тӧроезлэн воштӥсез Татьяна Голикова.

 «Сям-йылолъёсты утись семья» номинациын вормисе потӥз Якшур-Бӧдья ёросысь Широбоковъёслэн семьязы. Василий но Лилия кузпалъяськизы 10 ар талэсь азьло, будэто 3 пиналъёссэс. Василий пулэсь пӧртэм арбериос лэсья, Лилия — этноблогер. Кузпалъёс мылысь-кыдысь пырисько пӧртэм ужрадъёсы, бере уг кылё пиналъёссы но.
— Такем вылӥ данъямзылы туж шумпотӥськомы. Россилэн пӧртэм улосъёсысьтыз адӟем карымон семьяосын тодматскимы, мылкыдмы бурдъяськемын! — пусйиз Лилия Широбокова.

 Елена Слащёва.