ИИ. И мар?

Кылдытэм визь сярысь трос киноос,  книгаос вань. Со сярысь вераськонъёс кутскизы дунне вылэ нырысетӥ компьютеръёс потэм бере – 40-тӥ аръёсы. Ӵемысь сое алама паласен адӟыто: адямиосты быдтыны, улонэн кивалтыны турттэ. Мынам со ласянь кӧня ке мукет малпанэ.

Дунне вылын кемалась кылдытэмын ни пӧртэм ИИ-ос, но соос туж лябесь на. Ваньзылы соослы, мон малпамъя, ачиз ассэ тупатон,умойгес карон быгатонлык уг тырмы. Кылсярысь, компьютерной программаез  ачиз ассэ тупатъяны дышетӥм ке, со ас понназ малпаськыны быгатоз. Сое шонер дышетыны гинэ быгатыны кулэ. Нырысь со пичи нылпилы кельшоз, солы ваньмыз тунсыко луоз, ваньзэ тодыны турттоз. Каллен-каллен адямилэн улонэныз пыӵалоз. Адямилы лыдӟиськыны, гожъяськыны но вераськыны дышетскон понна трос аръёс кулэ – нош ИИ-лы дунне вылысь вань кылъёсын вераськыны дышон понна кӧня ке час тырмоз.

Тросэзлы со туж кӧшкемыт потэ, угось нокин уг тоды, мар луоз, дунне вылын адямилэсь трос полы визьмогес существо кылдӥз ке. Но мон малпамъя, адями ИИ-ез кылдытӥз ке но, аслаз ки улаз возьыны быгатӥз ке, со адямиез трос полы шудогес карыны юрттоз: трос висёнъёс вормемын луозы, сютэм улон быроз, оло, кулонлэсь но утиськыны кылдоз. Но со дунне вылысь улонэз но быдтыны быгатоз. Стив Возняк вера, со ядерной бомбалэсь трос полы кӧшкемытгес шуыса. Озьы ик вань: ядерной бомбаен адями кивалтэ, нош ИИ-ен адями пырак кивалтыны уз быгаты ни.

Григорий Григорьев.