Пичи Чеберайёс но Батыръёс Обыдалы весь лэсьтӥзы

Та нуналъёсы элькунысьтымы котькуд ёросъёсын "Пичи Чеберайёс но Батыръёс" вожвылъяськонлэн 1-тӥ люкетэз ортче. Красногорск черкогуртысь лулчеберетъя юртэ но трос гинэ пиналъёс люкаськылӥзы.Кин бен луиз Пичи Чеберай, нош кин - Пичи Батыр? Красногорскысь кенешчиосмы иворто:Аспӧртэмлыко ӵошатсконэ пыриськизы дас нылпиос. Со Красногорскысь нылпи садъёсы ветлӥсь пичильтыкъёс, Дёбыысь нунокъёс но Красногорск школаысь но гимназиысь нырысетӥ классын дышетскисьёс.Конкурсэ пыриськисьёс тупен-тупен веразы семьязы сярысь, кин маин тунсыкъяське. Озьы тодӥмы, кин тупен шудыны яратэ, кин книгаос сьӧрын ӵем пуке, кинлэн семьяяз ӵошен пельнянь пӧрало. Тодӥмы, кинлэн агаез дышетске шаермес утисьлы, кинлэн песятаез, ӵыжы-выжыез СВО-ын, кинлэн песятаезлэн песятаез Быдӟым ожын ожмаськиз, Берлинозь вуиз, кинлэн пересез "лагерь смертников" пыр потоно луиз.Нылпиос суредаськыны быгатэмзэс но возьматӥзы. Буёлъёс пыр шаерзэс яратэмзэс веразы. Тунсыко соиз но, "Катюша" кырӟанэз удмурт кылын кырӟазы ӵошатсконэ пыриськисьёсын ӵош залысь эшъёссы но. Тӥни сыӵе со "группа поддержки" луиз.Нылпиос доры куное вуылӥз Коркакузё. Удмурт калык шудонъёсын со тодматӥз. Пиналъёс вуылӥзы Нюлэсмурт, Вумурт но Обыда доры. Озьы соос пӧйшуръёсын тодматскизы, чорыганы быгатэмзэс возьматӥзы, чебер весь Обыдалы лэсьтӥзы.Ужрадэ вуылӥзы пиналъёслэн эшъёссы, анайёссы. Василиса Судневалэн Катя ӵужанаез но палэнэ ӧз кыльы - перепеч пӧраса ваем.Пӧртэм конкурсъёс пыр ортчыса, тодмо луиз, кин Пичи Чеберай но кин Пичи Батыр. Со Красногорскысь куинетӥ номеро нылпи садысь Лида Захарова но Данил Омелюхин. Ӟечкыласьком!