Пичи калыклэн быдӟым кылбурчиез

Яр ёросысь Вортча гуртын Михаил Федотовлы сӥзем выльдэм музей висъет усьтӥськиз. Тодмо удмурт но бесерман кылбурчилэн творчествоезлы сӥзем ужрад поэтлэн вордскем нуналэзлы тупаз. 7-тӥ коньывуонэ Михаил Федотовлы 67 арес тырмысал.

Михаил Иванович Федотов (1958-1995) – Яр ёросысь Вортча гуртын вордӥськем бесерман но удмурт кылбурчи. 1981-тӥ арын Удмурт кун университетысь кылосбуръя факультетэз йылпумъяз. 1983-тӥ арын армиысь бертэмез бере «Удмуртия» книгапоттонилэн редакторез луыса ужаз. Улэп дыръяз «Тӧдьы юсьёс берто», «Берекет», «Вӧсь» бичетъёсыз потӥзы, «Вирсэр» но «Ӝуждала» бичетъёсыз улонысь кошкемез бере печатламын вал. «Берекет» бичетэз понна Флор Васильев нимо премиен пусъемын. Аслаз творчествояз Михаил Федотов бесерман калыклэсь сям-йылолъёссэ но йӧскалык дунлыкъёссэ усьтӥз.