Удмуртия пыриське Россиын ортчись «Служение» марафонэ. Ужрад радъяське Президент Владимир Путин кичӧлтэмъя. Со улсын муниципал служащийёслы премия сётӥськоз, соос муниципал кылдытэтэз мыло-кыдо азинто но отын улӥсьёслы котыр ласянь юрттӥсько ке. Марафонэ пыриське Сьӧлта ёросысь Кильмезь инты ёзысь Сергей Маматов. Воргорон 2 ар спецоперациын вал. Бӧрысь сӧсырмиз но вордскем палъёсаз берытскиз. Но Атыкай музъеммес утемысь но азинтэмысь ӧз дугды. Али со «СВОй резерв18» программая тодон-валанзэ будэтэ.
— Кунмылы, калыклы юрттэт сётон котьку нырысетӥ интыын луыны кулэ. Зэм, ожгар службаме мон кельтоно луи. Но али мукетсэ службаме азинтӥсько — ёросэлы но шаерелы юрттӥськисько! — вера С. Маматов. Озьы ик марафонын кужымзэ мерта Вотка город администрациысь культурая, спортъя но егитъёсын ужан политикая управленилэн кивалтӥсез Татьяна Коновалова. Со «Лето в городе» проект кылдытӥз. Озьы нылпиос но быдэ вуымтэос гужем каникулъёссэс пайдаё но тунсыко ортчытыны быгатӥзы. Вавож ёросысь Татьяна Воронцова 25 ар ЗАГС-ын ужаз. Берло 3 арзэ ёрос йырлэн улон-вылонын юрттэт сётонъя воштӥсез луэ. Т. Воронцова тыршемен, районын данъяло трос аръёс ӵоже ӵош улэм кузпалъёсты, «юбилейной» нуныосты. Та сяна, со районысь нылкышноослэн огазеяськонэнызы кивалтэ. Алигес радъяз «Красота женщины в её здоровье» форум: сюбег специалистъёс гуртоослы визь-кенеш сётӥзы.

Ольга Корепанова.

Туспуктэм: муниципалитеты.рф