Ижысь Алексеевъёслэн семьязы анай капиталлы 175 сюрсэтӥ сертификат басьтӥз: шаерысьтымы сомында семьяослы юрттэт сётэмын

Социальной фондлэн Удмурт ёзэзлэн юртаз Алексеевъёслы сертификат сётыны вуылӥзы Удмуртилэсь Кун Думае быръем депутат Андрей Исаев, Россиысь Социальной фондлэн кивалтӥсезлэн воштӥсез Андрей Чалов.

Алексеев кузпалъёслэн — Николайлэн но Анналэн — 2-тӥ нылпизы вордскиз. Нылзылы соос Мария ним сётӥзы. Сертификатэз басьтыны анай-атаеныз но сузэреныз ӵош фондлэн юртаз лыктӥз бадӟымез Захар пизы но. Анна шуиз: сертификат электрон амалэн вуиз Кун услугаосъя огъя порталэ, Мариялэн вордскемез сярысь свидетельствоез басьтэмзы бере ик. Анай капиталэнызы соос улон интызэс паскытатын чаклало.

‼ Социальной фондлэн Удмурт ёзэзлэн кивалтӥсез Андрей Бельтюков ивортэмъя, туэ 6 толэзь куспын сертификат басьтӥзы 2 сюрс 900 семьяос — соослы висъямын 1 миллиард 880 миллион манет. Президент Владимир Путин косэмъя, анай капиталъя программа быдэсъяськоз 2030-тӥ арозь. Та юрттэт сяна, нылпиосын семьяослы улосмылэсь но уксё висъяське: 35 аресозь анай-атайёслэн 3-тӥ но со бӧрсьы вордскем нылпиоссы понна 300 сюрс манет висъяське. Алексеевъёслы сертификат сётон ужрадын вал СВО-ысь Суворов медален пусъем ветеран Сергей Едигарев. Солы реабилитация ортчыны сертификат сётӥзы. СВО-лэсь азьвыл со вал Сириысь операциын, пыриськиз Крымез Киевлэн ожгарчиосызлэсь мозмытонэ. Али ужа военкоматын.

— 2022-тӥ арысен та дырозь Кун Дума юнматӥз ветеранъёслы но матысь адямиоссылы юрттэт сётон сярысь 130 законъёсты, унояз воштонъёс пыртӥмы, — шуиз депутат Андрей Исаев.

Туспуктэмъёс: Тӧролэн но Правительстволэн пресс-службаез.